Fototeka | Collection

AUTORË TË PANJOHUR

Rubrika përfshin printe dhe negativë nga fundi i shekullit XIX deri në periudhën komuniste, për autorësinë e të cilave mungojnë të dhënat. Imazhet më të hershme në pllaka xhami u takojnë viteve 1900, ndoshta ca më herët, dhe paraqesin banorë, familje dhe ngjarje të ndryshme nga juglindja e vendit, kryesisht nga Korça dhe fshatrat përreth.

Shkrepjet mund t’u përkasin fotografëve korçarë të fillimit të shekullit XX, ndoshta Thimi Racit, Kristo Sulidhit, Ath Nikolakopulos apo ndonjë tjetër fotografi aktiv të periudhës. Meqenëse negativat, kryesisht në xham, janë gjetur në familje të ndryshme dhe pa shënime përkatëse, është e vështirë të përcaktohet autorësia, të paktën në këtë fazë.

Pamjet paraqesin interes të veçantë jo vetëm etnografik, meqenëse dokumentojnë gjithashtu edhe ngjarje, personazhe dhe vende domethënëse të historisë shqiptare, që nga sundimi osman, Lufta e Parë Botërore, monarkia, e deri në regjimin diktatorial.

Një tjetër koleksion pllakash xhami i gjendur në qytetin e Shkodrës, veç pamjeve të malësorëve vendas përmban edhe disa shkrepje të bukura të ushtarëve austro - hungarez të Luftës së Parë Botërore. Janë pamje të rralla që pasqyrojnë me vërtetësi ditën e një njësie ushtarake, me gjasë përgjegjëse për punët e furnizimit dhe mencës.

“Në kuzhinë”, “Dolli me vendas”, “Duke përgatitur derrin për gatim”, “Shtrëngim duarsh me kuzhinierin” - janë disa nga subjektet e veçanta, që dokumentojnë përditshmërinë e kësaj toge në Shkodrën e viteve 1916 – 1917. Shkrepjet mund të jenë të piktorit dhe fotografit Kolë Idromeno, por të dhënat janë ende të pamjaftueshme për të pranuar këtë hamendësim.

Gjithësesi lënda e përmbledhur në këtë rubrikë është ende në fazë shqyrtimi dhe ende po punohet për qartësimin e përmbajtjes dhe përcaktimin e autorësisë.

Rubens Shima

@@@@@@@