Fototeka | Collection

PETRIT RISTANI

Djali i fotografit Vasil Ristani, Petriti, u lind në Tiranë më 1942. Familja Ristani ishte vendosur në kryeqytet në 1936. Studioja fotografike e të atit ishte ndër më të njohurat në kryeqytet prej fundit të viteve 1930 deri në mbylljen e saj, më 1947, nga regjimi totalitar. Petriti u rrit në një mjedis ku fotografia ishte gjithçka për familjen. Që në moshë të njomë ai punon me ngjyrosjen e fotografive ne shtepi, ndërsa pushimet e verës i kalonte në studiot shtetërore ku punonte i ati (‘Foto Ylli’,‘Foto Moska’), duke mësuar larjen e filmave.

Shkollën fillore dhe të mesme e bën në Tiranë. Më pas, më 1962, diplomohet në fakultetin 2-vjeçar për matematikë – fizikë, po në Tiranë. Pas përfundimit të fakultetit emërohet arsimtar në Fier, ku punon për dy vjet. Shërbimin ushtarak e kryen në Tiranë më 1964 – 1966, në Laboratorin Fotografik të Ushtrisë, ku merret kryesisht me retushime dhe ngjyrosjen e fotografive me laps, akuarel dhe vaj, të cilat përdoreshin në ekspozita të ndryshme propagandistike të ushtrisë.

Pas përfundimit të shërbimit ushtarak, për nevojat e Shtëpisë Qendrore të Ushtrisë emërohet si fotoreporter në Laboratorin Fotografik të Ushtrisë, në të njëjtin laborator ku kishte shërbyer ushtar. Për shumë vite merret me ekspozita dhe aktivitete propagandistike të ushtrisë dhe njëkohësisht ishte dhe një ndër fotoreporterët e gazetës së ushtrisë “Luftëtari” dhe revistës ilustrative “10 Korriku”, organe shtypi të Drejtorisë së Kulturës dhe Propagandës të Mistrisë së Mbrojtjes Popullore.

Si fotograf i ushtrisë ai ndjek thuajse të gjitha stërvitjet ushtarake, kongreset e partisë, parakalimet dhe paradat ushtarake. Me mijëra janë shkrepjet nga stërvitja luftarake me emrin e koduar ‘Tomorri’ në Qafë të Qarit, Korçë, ku ishte dislokuar Shtabi i Përgjithshëm i Ushtrisë. Më pas dokumenton stërvitjet ushtarake në Dajt, Manzë, Roskovec, garat e skive në Bizë të Martaneshit, si dhe manovrat ushtarake detare në Shëngjin, Vlorë, Sazan, Sarandë, Kep të Rodonit në Durrës.

Janë me qindra shkrepje e bëra nga anijet katërsilurëse, inskenime simulimesh luftarake, ekuipazhet e nëndetëseve ne stërvitje, mjete lundrimi luftarake (dragamina, gjuajtës) në patrullim etj. Ai ndjek gjithashtu stërvitjet ajrore në Kuçovë, Gjadër, Rinas, ku ndodheshin edhe bazat e avionëve dhe helikopterëve ushtarakë.

Janë plane shkrepjesh të menduara dhe ndërtuara me kujdesin e një regjisori, fotografi të realizuara në koordinim mbresëlënës të mjeteve dhe trupave në lëvizje. Imazhe propagandistike që kishin për qëllimi glorifikimin, ngulitjen te popullata të idesë së pathyeshmërisë së ushtrisë shqiptare dhe më e rëndësishmja demonstrimin para botës të forcës, mjeteve dhe madhështisë së saj.

Për “punë të dalluar”, pas afro 10 vitesh si fotograf i ushtrisë, më 1975 emërohet përgjegjës i Laboratorit Fotografik të Ushtrisë, pozicion që e mban gjer sa del në pension më 1992.

Laboratori i Ushtrisë u krijua për nevojat e Ushtrisë Popullore në fillim të viteve 1950 dhe ishte ndër më të pajisurit në vend.

Deri në 1973 fotografitë që përdoreshin për ekspozitat propagandistike të ushtrisë si edhe kopertinat e revistës “10 Korriku” retushoheshin nga Petriti në këtë laborator. Në 1974 laboratori përdori teknologjinë gjermano-lindore dhe më pas kineze të fotografimit me ngjyra: film negativ dhe diapozitiv me ngjyra i formateve 6 x 9 mm dhe 35 mm, si dhe larje dhe stampimin po me ngjyra.

Petrit Ristani jeton dhe punon në Tiranë.

Rubens Shima

@@@@@@@

Si fotograf i ushtrisë ai ndjek thuajse të gjitha stërvitjet ushtarake, kongreset e partisë, parakalimet dhe paradat ushtarake. ##### ##### ##### Janë plane shkrepjesh të menduara dhe ndërtuara me kujdesin e një regjisori, fotografi të realizuara në koordinim mbresëlënës të mjeteve dhe trupave në lëvizje. Imazhe propagandistike që kishin për qëllimi glorifikimin, ngulitjen te popullata të idesë së pathyeshmërisë së ushtrisë shqiptare dhe më e rëndësishmja demonstrimin para botës të forcës, mjeteve dhe madhështisë së saj.