Ath. Nikolakopulos (AΘ. K. NIKOΛAKOΠOYΛOY) ishte një fotograf grek, për jetën dhe punën e të cilit dihet fare pak. Sipas të dhënave të derisotme, diku në fillim të shekullit XX (ndoshta edhe më herët) Athanasios Nikolakopulos kishte hapur studion e tij fotografike në Korçë, me gjasë ndër të parat në qytet. Tek ato pak printe të vjetra që hasim ngandonjëherë, shquhet qartazi kartoni i personalizuar me firmën dhe emrin e studios së tij ‘H ПPOO∆OΣ’ (Përparimi). <br><br>

Është e vështirë të përcaktohet viti i çeljes dhe jetëgjatësia e kësaj studioje, por për te pasur nje ide mbi veprimtarine e saj na vijnë në ndihmë shënime (data dhe dedikime familjare) nga pas fotove të gjetura, të cilat na shtyjnë të mendojmë se studioja është hapur në fillim të shekullit XX, dhe ka qenë ndër më të njohurat në qytet. Subjektet e fotografuara në këto vite të hershme janë kryesisht personazhe me peshë, familje të klasës së pasur të qytetit, zotërinj të veshur plot sqimë, fëmijë me kostume tradicionale, nxënës me libra në duar, të rinj që pozojnë me rroba zbavitëse në ditën e karnavaleve - gjithë ç’mund të ofronte një qendër e rëndësishme urbane si Korça në fillimet e shekullit XX. <br><br>

Aktiviteti i tij i ngjeshur fotografik mendohet të ketë vijuar për rreth 25 vjet, ndërsa dëshmitë e prodhimtarisë së tij fotografike, njëherë e një kohë të gjendura gati në çdo familje korçare, fillojnë e humbin diku në fillim të viteve 1930. Mjerisht, tërë arkiva e Athanasios Nikolakopulos ka humbur. Emri i tij u zhduk nga historia e fotografisë, me gjasë si i papërshtatshëm dhe ca i sikletshëm për narrativën ‘kombëtare’ të fotografisë shqiptare. Të vetmet mbetje nga puna e tij janë ca printe të vjetra të gjendura aty – këtu dhe ndoca negativë xhami të shpëtuar si për një tekë të historisë, prapëseprapë krejt të pamjaftueshme për të kuptuar veprën e keqtrajtuar të këtij pionieri të fotografisë në Shqipëri. Publikohet për herë të parë nga “Fototeka.al”. <br><br>

Rubens Shima

@@@@@@@

Aktiviteti i tij i ngjeshur fotografik mendohet të ketë vijuar për rreth 25 vjet, ndërsa dëshmitë e prodhimtarisë së tij fotografike, njëherë e një kohë të gjendura gati në çdo familje korçare, fillojnë e humbin diku në fillim të viteve 1930. ##### ##### ##### Emri i tij u zhduk nga historia e fotografisë, me gjasë si i papërshtatshëm dhe ca i sikletshëm për narrativën ‘kombëtare’ të fotografisë shqiptare. 

@@@@@@@

A. Nikolakopulos | Nxënës në studio, Korçë | Rreth 1920-1925 | pllakë xhami

@@@@@@@

A. Nikolakopulos | Zotëri korçar me të birin | Rreth 1920-1925 | pllakë xhami